Lajme ndërkombëtare

[Monika]

Izrael: Një palestinez vret 3 vetë, plagos 45 të tjerë me buldozer

02-07-2008





Autoritetet izraelite thonë se një burrë palestinez përplasi një buldozer me një sërë automjetesh dhe këmbësorësh duke vrarë tre persona dhe duke plagosur 45 të tjerë para se ta vriste policia.


Autoritetet thonë se shoferi u vra nga një polic që hipi tek buldozeri ndërsa kalonte sot në rrugën kryesore të Jeruzalemit Xhafa. Zyrtarët e cilësuan një sulm terrorist incidentin.


Policia thotë se shoferi ishte një burrë arab nga Jeruzalemi lindor i cili kishte kryer vepra penale edhe në të kaluarën. Një zëdhënës i qeverisë izraelite tha se ai punonte për një kompani që po bënte punime në rrugë, ku ndodhi incidenti.




Grupi ekstremist palestinez Hamas mohoi që ta kishte kryer sulmin dhe tha se nuk ka informacion për autorin. Por një zëdhënës i Hamasit e cilësoi incidentin një reagim të natyrshëm ndaj agresionit të përditshëm izraelit ndaj palestinezëve.

Zëri i Amerikës

[Nosh]

Japonia shënon rekord të deficitit tregtar



Ministria e Financave e Japonisë tha të hënën se vendi ka shënuar rekord të deficitit tregtar në muajin e kaluar, ndërsa eksporti ka rënë për muajn e katërt me radhë.
Ministria e Financave raportoi për një deficit prej 18.47 miliardë dollarësh.
Eksportet kanë rënë për 9.3 për qind krahasuar me janarin e vitit të kaluar.
Importi është rritur për 9.8 për qind në muajin e kaluar, i nxitur nga kërkesat për energji dhe karburante, pas mbylljes së reaktorëve bërthamorë si pasojë e tragjedisë bërthamore në Fukushimë në marsin e vitit të kaluar.

Bota Sot

[Nosh]

Takim i eurozonës për Greqinë



Ministrat e financave të eurozonës takohen sot në Bruksel për të biseduar për pakon e shpëtimit prej 130 miliardë eurosh për Greqinë.
Pakoja ka për qëllim që të pengojë falimentimin e Greqisë për shkak të pamundësisë pë të paguar borxhet.
Një falimentim i tillë do të sillte pasoja për monedhën euro si dhe për ekonominë globale.
Athina ka pranuar masat shtrënguese të kursimit që janë kundërshtuar në masë të madhe nga grekët, si parakusht për kredinë.
Gjermania dëshiron që Greqia të japë garanci shtesë, për t’u siguruar se Athina do t’i paguajë borxhet, edhe në rast të ndryshimit të qeverisë.
Kritikët thonë se kjo kërkesë do të jetë një ndërhyrje e paprecedentë në çështjet sovrane fiskale të një shteti.

Bota Sot

[Nosh]

Arrihet marrëveshja për Greqinë

Athinë, (Kosovapress) 21 Shkurt 2012 10:28

Ministrat e Financave të Eurozonës kanë arritur marrëveshje për të ndihmuar Greqinë nga falimentimi, me një paketë në vlerë prej 130 miliardë eurosh, ka njoftuar kreu i euro-grupit, Zhan Klod Xhanker.

“Pas një takimi prej të paktën 13 ose 14 orësh, kemi arritur një marrëveshje për programin e ri të Greqisë, me përfshirjen edhe të sektorit privat, që do të çojë në një reduktim të rëndësishëm të borxhit për Greqinë”, ka thënë Xhanker.
Sipas njoftimeve, marrëveshja ka për qëllim të sjellë borxhin e Greqisë në 120.5 për qind të bruto prodhimit vendor deri në vitin 2020.
Diplomatët në Bruksel kanë thënë se duhet punuar ende për detajet e marrëveshjes, pas një maratonë negociatash.
Greqia ka nevojë të jashtëzakonshme për paketën e ndihmës për të shpëtuar nga falimentimi që do të mund të pësonte muajin e ardhshëm.
Pas pesë vjetësh në recesion, Greqia ka borxhin më të madh se 160 për qind e bruto prodhimit të brendshëm.
Parlamenti grek ka miratuar një sërë masash shtrënguese në vlerë prej 3.2 miliardë eurosh, së bashku me reformat që synojnë rimëkëmbjen e ekonomisë, si parakusht për marrjen e ndihmës.
Masat e miratuara kanë shkaktuar pakënaqësi të thella në Greqi, që kanë rezultuar edhe me protesta të dhunshme.

[Nosh]

Kinë, 10 të vrarë nga shpërthim në një fabrikë

Pekin, (Kosovapress) 21 Shkurt 2012 10:54

Shpërthimi në një fabrikë çeliku në Kinë, u ka marrë jetën, të paktën dhjetë punëtorëve. Mediat lokale shkruajnë se shtatëmbëdhjetë persona të tjerë janë plagosur në incidentin që ka ndodhur në makinerinë në Anshan.

Agjencia shtetërore e lajmeve, Xinhua, ka thënë se ekipet e shpëtimit po vazhdojnë kërkimet për tre punëtorë të zhdukur, ndërkohë që shkaku i shpërthimit është duke u hetuar.

[Nosh]

Gjermania voton për presidentin më 18 mars



Parlamenti gjerman do të votojë presidentin e ri më 18 mars. Lajmi është bërë i ditur nga kryetari i këtij institucioni, Norbert Lamert.
Një gjë e tillë shihet si formalitet pasi partitë qeveritare të Gjermanisë dhe opozita janë pajtuar për emërimin e Joakim Gaukut, ish-pastor protestant në Gjermaninë Lindore, që ka kundërshtuar regjimin komunist.
Gauk do të pasojë Kristian Vulfin, i cili ka dhënë dorëheqje javën e kaluar, për shkak të akuzave për afera korruptive. Vulf ishte i zgjedhuri i kancelares gjermane, Angela Merkel.

Bota Sot

[Nosh]

Jemeni voton për presidentin



Në Jemen sot zhvillohen votimet për zgjedhjen e presidentit. Bëhet fjalë vetëm për një kandidat, Abed Rabo Hadi, zëvendësin e Ali Abdullah Salehut, i cili ka qeverisur vendin për 33 vjet.
Zgjedhjet janë pjesë e marrëveshjes së mbështetur nga Shtetet e Bashkuara, ndërmjet Salehut dhe opozitës.
Një vit i protestave, të cilat disa herë kanë rezultuar me viktima, ka detyruar Salehun të largohet.
Jemeni, vendi më i varfër i rajonit, është bërë shënjestër e Al Kaidës, sidomos në jug, ku aktivistët thonë se do t’i bojkotojnë zgjedhjet.
Aktivistët jugorë akuzojnë veriun për marrjen e burimeve të tyre dhe për diskriminim kundër tyre.
Në prag të zgjedhjeve, persona të armatosur kanë sulmuar tre vendvotime në jug.

Bota Sot

[Nosh]

Dyzetegjashtë gazetarë të vrarë gjatë 2011-ës



Komiteti për Mbrojtjen e Gazetarëve ka bërë të ditur për vrasjen e 46 gazetarëve vitin e kaluar, në vende të ndryshme të botës.
Në raportin e tij vjetor “Sulmet në shtyp 2011”, grupi me seli në Nju Jork tha se Pakistani ka qenë vendi më i rrezikshëm për gazetarët, ku janë regjistruar 7 viktima.
Ai është pasuar nga Libia dhe Iraku, me nga pesë gazetarë të vrarë.
Komiteti për Mbrojtjen e Gazetarëve tha se 15 gazetarë kanë humbur jetën gjatë mbulimit të Pranverës Arabe.
Organizata tha se të paktën 179 punëtorë mediatikë janë burgosur në 2011-ën, çfarë paraqet nivelin më të lartë që nga vitet 1990.
Raporti dënon fushatat e qeverive për të heshtur mediat në vendet si: Kina, Siria dhe Egjipti.

Bota Sot

[Nosh]

Shtraus Kan hetohet për prostitucion



Policia franceze do të marrë sot në pyetje ish-kreun e Fondit Monetar Ndërkombëtar, Domenik Shtraus Kan, si pjesë e hetimeve që po bëhen në lidhje me një prostitucion të organizuar.
Policia po heton prostitucionin në hotelet e Francës dhe Belgjikës, ndërsa dyshohet se në këtë rast janë të përfshirë edhe disa zyrtarë policorë, si dhe autoritete të tjera të larta.
Disa prostituta që janë marrë në pyetje, pohojnë se në vitin 2010 dhe 2011 kanë pasur marrëdhënie me Shtraus Kanin në Paris dhe në Uashington.
Shtraus Kan ka jetuar në Uashington gjatë kohës së ka qenë në krye të FMN-së. Ai ka dhënë dorëheqje nga ky post në majin e vitit të kaluar, për shkak të aferës me një shërbyese hoteli.

Bota Sot

[Nosh]

Arrestohen 9 terroristë turq në Itali

Romë, (Kosovapress) 21 Shkurt 2012 18:36

Policia italiane ka arrestuar nëntë anëtarë të një celule terroriste e varur nga lëvizja turke Hezbollah, që nuk ka asnjë lidhje me grupimin libanez. Lajmin e kanë kumtuar gjatë ditës së martë mediat italiane, sipas të cilave turqit e arrestuar akuzohen për favorizim të emigracionit klandestin.

Në kuadër të hetimeve janë kryer edhe rreth 40 kontrolle. Arrestimet janë kryer nga policia e qytetit të Ternit dhe nga Shërbimi Qendror i Antiterrorizmit, nënvizojnë burimet mediatike.
Hetimet mbi këtë grup nisën pas arrestimit në rajonin e Lombardisë të një shtetasi turk, mbi të cilin ishte lëshuar një urdhër-arrest ndërkombëtar për terrorizëm.
Duke hetuar mbi personin në fjalë, hetuesit arritën të depërtonin tek një strukturë kriminale, tërësisht operative, e përbërë nga anëtarë të Hezbollahut turk.
Organizata, sipas detajeve të zbuluara gjatë hetimeve, sillte në Itali klandestinë kurdë dhe palestinezë me dokumente falso që u mundësonin atyre kërkesën për të kërkuar azil politik dhe leje qëndrimi.
Hezbollahu turk, një sekt islamik sunit, ka lindur në fillim të viteve ’80 me qëllim krijimin e një shteti islamik të bazuar tek ligji i Sharias, në territorin e Republikës Turke.

[Nosh]

Atentat në 'presidentin' e Abhazisë

Tbilisi, (Kosovapress) 22 Shkurt 2012 10:44

Kryetari i Abhazisë, provincës separatiste të Gjeorgjisë, Aleksandër Ankvab, i ka shpëtuar sot një atentati, gjatë të cilit janë varë dy truprojat e tij.

Gjatë sulmit mbi konvojin e Ankvabit, sulmues të panjohur kanë shpërthyer një minë dhe më pastaj kanë hapur zjarr mbi kolonën e veturave. Policia rajonale thotë se Ankvab nuk është lënduar, por që dy truprojat e tij kanë vdekur në spital, pas plagëve të marra gjatë sulmit.
Askush nuk ka marrë përgjegjësin për këtë sulm, i cili ka ndodhur para zgjedhjeve parlamentare të cilat do të mbahen muajin tjetër.
Rusia e ka pranuar pavarësinë e Abhazisë dhe provincën tjetër separatiste Osetinë jugore, si shtetet të pavarura, pas luftës midis Rusisë dhe Gjeorgjisë gjatë gushtit të vitit 2008 dhe ka mbajtur trupat e saja ushtarake në këto dy zona.
Ankvab, i cili është në rolin e kryetarit të Abhazisë që nga gushti i vitit 2011, deri më sot u ka shpëtuar pesë atentateve.