Ariu polar në malet e Jezercit!

[Gjoni]

Shoqata e gjuetarëve apelon tek anëtarësia dhe te banorët e asaj zone që të ruhet ky ari, ardhja e të cilit ka shkaktuar spekulime nga më të ndryshmet!

Po bëhen katër vjet që një ari polar bredh maleve të Jezercit. Prania e ariut të bardhë në malet, ku jeton ariu i murrmë autokton, ka krijuar spekulime të shumta. Për herë të fundit ariu polar është parë më 29 prill të këtij viti. Atë e ka takuar i fundit Ibrahim Hyseni nga fshati Jezerc, ndërsa po pastronte pyllin e tij në lagjen Prork të këtij fshati.

Ibrahim Hyseni për këtë rast ka lajmëruar rojën e pyllit, të caktuar nga shoqata e gjuetarëve “Shqiponja” në Ferizaj, Rexhep Malokun. Maloku ishte i pari që kishte ndeshur në ariun e bardhë. Ai herën e fundit e kishte parë duke çaluar në këmbën e parë të djathtë. Sipas Ibrahim Hysenit, ariu i bardhë tash ka këmbën e shëruar. Kjo gjë i ka gëzuar udhëheqësit e shoqatës “Shqiponja”.

Kryetari i kësaj shoqate, Isak Aliu, ka thënë për “Express” se kanë ndërmarrë të gjitha masat që të ruhet ky ari, i cili është adaptuar mirë në malet e Jezercit. “Rastin e pranisë së ariut polar e kemi shqyrtuar edhe në Federatën e Gjuetarëve të Kosovës. E kemi biseduar edhe me ekspertin Mikel Gegajn, inxhinier i pylltarisë dhe gjuetisë”, ka thënë kryetari Aliu.

Ai ka pranuar se nga të gjitha spekulimet që bëhen për praninë e ariut të bardhë në vendin e arinjve të murrmë, dy mundësi janë diskutuar më shumë. Mundësia e parë, sipas ekspertit Gegaj, ka qenë ajo se ariu mund të jetë autokton, por i sëmurë nga ndonjë sëmundje e lëkurës, e cila ka ndikuar në pigmentin e qimes së tij. Por, sipas kryetarit Aliu, kjo mundësi nuk qëndron, sepse ariu është i shëndoshë dhe se ka qimen e vetë origjinale.

“Ne vazhdojmë të dyshojmë se ariu i bardhë ka mundur të vjen nga Bosnja, përkatësisht nga ndonjë kopsht zoologjik i atjeshëm, ku ky ari ishte i pranishëm”, ka thënë kryetari Aliu, duke përmendur faktin se lufta kishte bërë që të lëviznin kafshë të egra jo vetëm nga rezervatet, por edhe nga kopshtet zoologjike.

Hapësirat nga lëviz ariu i bardhë, shoqata e gjuetarëve “Shqiponja” i ka shpallur hapësira të mbrojtura tash e tri vjet. “Kemi 1800 hektarë të mbrojtur për katër vjet. Aty ndalohet gjuetia. Është një trekëndësh që prek komunën nga komuna jonë në atë të Shtërpcës dhe të Therandës. Ka raste kur nuk respektohet kjo urdhëresë, por janë raste të rralla dhe për to kemi bërë kallëzime penale në Gjykatën Komunale të Ferizajt”, ka thënë kryetari Aliu.

Ai ka theksuar se janë shumë të interesuar që ta ruajnë ariun e bardhë. “Kemi apeluar tek anëtarësia jonë dhe te banorët e fshatrave që të ruhet ariu polar dhe besoj se kjo gjë edhe do të ndodhë”, ka thënë Aliu i cili ka përmendur faktin se ariu polar në asnjë rast nuk është treguar agresiv dhe se nuk ka bërë ndonjë dëm.

“Ai është gjendur në një hapësirë të mirë. Malet e Jezercit kanë shumë burime uji dhe kanë shumë pemë të egra. Ka edhe bletë të egra atje. I ka të gjitha kushtet për të mbijetuar”, ka thënë kryetari i shoqatës së gjuetarëve “Shqiponja”, Isak Aliu, i cili i ka pajisur me aparat fotografik dy rojat e pyllit nga shoqata, për ta dokumentuar më mirë praninë e ariut polar në familjen e arinjve të murrmë të Sharrit.

Gazeta Express